Suliassamik aalajangersimasumik meeqqamut, inuusuttumut ilaqutariinnulluunniit kalaallisut tunuliaqutalimmut tunngasumik peqarpisi aamma immikkut siunnersorneqarnissarnik atorfissaqartitsivisi? Taava VISO-mi immikkoortortamut kalaallit oqaasii kulturiallu pillugit immikkut ilisimannittoqarfiusumut saaffiginnissinnaavusi.
Siunnersuinerup siunertaraa suliassinnut atatillugu periarfissassi nukittorsarnissaat meeqqap, inuusuttup inersimasulluunniit ajornartorsiutaa oqimaatsoq pillugu. Peqatigiilluta isumaqatigiissutigissavarput siunnersuilluni oqaloqatigiinnerit qassit ilissi eqqarsaatigalusi tulluartuunersut. Siunnersuilluni oqaloqatigiinnerni ajornartorsiut erseqqissaavigissavarput, nutaanik ilisimasanik sakkussanillu tunillusi, assersuutigalugu suliniutissat, periaatsit, suleriaasissaq, ataqatigiissaarineq imaluunniit suleqatigiinneq. Meeraq, inuusuttoq inersimasorluunniit taassumalu qanigisai siunnersuinermi nalinginnaasumik akuutinneqassapput. Siunnersuineq ingerlanneqassaaq suliamut ilinniarsimasunit, kalaallit oqaasiinik kulturiannillu immikkut ilisimasalinnit.
Siunnersuineq naggaserlugu nalunaarusiamik pissaasi, kaammaattuutinik ataatsimoorluta nanisimasatsinnik imalimmik, ajornartorsiummik suliaqarnissinni qanoq ingerlariaqqisinnaanissinnik tunngasunik.
Taamatut siunnersuinermik ingerlataqarnerup naammassereernerani VISO-p neqeroorutigisinnaavaa qaammatit arfinillit angullugit suliamik malinnaanissani. Suliassinnik nangitsinissinni taamaalilluta ikorfartorsinnaavatsigit, VISO-mit siunnersorneqarnerup ingerlanneqarneranit kaammattuutaasut aalajangiusimaniarlugit, taamaalilluni tamakku meeqqamut, inuusuttumut inersimasumulluunniit siumut isigaluni iluaqutaaniassammata. Siunnersuinerup ingerlareernerata kingorna suleqatigiinnerup nanginneqarnissaa qanoq isumaqartiginersoq suliamiit suliamut tunngatillugu nalilerneqarsinnaavoq.
Siunnersorneqarnissaq kissaatigigussiuk, taava saaffiginnissuteqassaasi. Tamanna sioqqullugu angajoqqaat, angajoqqaanngortussat imaluunniit inuusuttut 15-nik ukioqalereersimasut akuersiteqqaartussaavasi.
Saaffiginnissutersi VISO saaffiginninnermut immersugassaa digitaliusoq atorlugu nassiutissavarsi.
Kingornatigut siunnersortimit VISO-meersumit, immikkut suleqatigiiffiusumeersumit attavigineqassaasi, ingerlatsinissaq pilersaarusiornissaa pillugu.