Apeqqutit akissutaallu

VISO-mi immikkoortortaqarfiup qulaajaanera kommunip angajoqqaatut piginnaasanik misissuineranut, ataqatigiinnermut misissuineranut imaluunniit meeqqap tarnip pissusaanut tunngasumik misissuineranut taarsiutaava?
Naamik, taamaanngilaq. Immikkoortortaqarfiup misissuinermi immikkoortut nalinginnaasumik tarnip pissusaanut tunngasunik misissuutit aalajangersimasut atorlugit qulaajarneqartussaagaluartut qulaajassavai. Barnets lov § 171 b-imi tamanna allassimavoq. Taamaattumik immikkoortortaqarfiup qulaajaanera kommunip suliaq pillugu paasissutissanik pisariaqartunik katersineranut tapertaavoq.

Immikkoortortaqarfiup innuttaasup eqqarsartaatsikkut piginnaasai qanoq nalilertarpai misissuutit aalajangersimasut atornagit?
Kommunip aamma immikkoortortaqarfimmi immikkut ilisimasallip suliami ataasiakkaani suut qulaajarneqassanersut tamatigut nalilersortarpaat. Innuttaasup eqqarsartaatsikkut piginnaasai tarnip pissusaanik ilisimasalittut ilinniagaqarsimasumit immikkut ilisimasalimmik qulaajarneqassapput. Qulaajaanermi paasissutissat assigiinngitsut arlallit atorneqassapput, soorlu suliami allagaataareersut, malinnaaffiginninnerit aaqqissuussat aaqqissuussaanngitsullu, kiisalu meeqqamik, inuusuttumik, angajoqqaanik imaluunniit angajoqqaanngortussanik ilaqutariillu attaveqarfigisaannik allanik naleqquttunik oqaloqatigiinnerit.

Kommuni nammineq saniatigut misissuisitsissava? Aamma suut imarissavai?
Suliami paasissutissanik pisariaqartitsiffigineqassappat kommuni angajoqqaatut piginnaasanik misissuineq, ataqatigiinnermut misissuineq imaluunniit meeqqap tarnip pissusaanut tunngasumik misissuineq suliarissavaa. Immikkoortortaqarfiup qulaajaanera tapertaavoq, misissuinermi immikkoortut misissuutit atorlugit paasineqartussaagaluartut pillugit akissutinik ilanngussalluni.

Kommunimi tarnip pissusaanik ilisimasalik aamma VISO-mi immikkoortortaqarfimmi immikkut ilisimasalik isumaqatigiinngippata imaluunniit inerniliussaat assigiinngippata qanoq iliortoqassava?
VISO-mi immikkoortortaqarfiup qulaajaanera kommunip aalajangiinerani paasissutissatut atorneqassaaq paasissutissat allat ilangullugit. Paasissutissat assigiinngitsut aallaavigineqaraangata paasissutissat assigiinngitsut imaluunniit akerleriittut saqqummersinnaapput. Kommunilu misissuinermi paasissutissat tamaasa ataatsimut isigalugu naggataarutaasumik inerniliissaaq.

Barnets lovip allanngortinneqarnerata kingorna angajoqqaatut piginnaasanik misissuineq pillugu nunami tamakkerlugu malittarisassat allanngortinneqarsimappat?
Aap, taamaappoq. Angajoqqaatut piginnaasanik misissuinerup suliarineqarneranut atorneqarnissaanullu malittarisassat atuaruk (maluginiaruk paasissutissat qallunaatut kisimik pissarsiarineqarsinnaammata)

Kommunit qulaajaanissamik noqqaassuteqarnermiit qulaajaaneq naammassineqarnissaanut qanoq sivisutigisumik naatsorsuutigineqarsinnaava?
VISO-mi immikkoortortaqarfiup suliap qanoq sivisutigisumik suliarineqarnera ataatsimut oqaatigineqarsinnaanngilaq, tassami tamatigut suliami pineqartumi pissutsit apeqqutaasarmata, ilaatigut suut misissorneqassanersut assersuutigalugu qassit peqataassanersut. VISO-mi immikkoortortaqarfik qulaajaanermik sapinngisamik sukkanerpaamik suliariniarsarisarpaa. Oqaatigineqarsinnaavoq suliat taamaattut aamma kommuni oqartussaasutut suliap suliarineqarnerani piumasaqaatinik atuuttunik malinninnissamut akisussaasuusoq, ilaatigut Barnets lov imaluunniit inuusuttunik pinerluttuliornermut akiuiniarnermut inatsit naapertorlugu meeqqanut imaluunniit inuusuttunut tunngasumik misissuinermut piffissarititat malinneqarnissaat.

Kommunini suliat qanoq nassaarisinnaavagut? Inuit sumiuussusaat tunngavigalugu nalunaarsuisanngilagummi?
Suliat nassaarineqarsinnaapput, assersuutigalugu meeqqanut inuusuttunullu siunnersortit suliami aalajangersimasumi malitseqartitsineranni, tassani ilaqutariinnut suliap misissorneqarnissaanut periarfissaq saqqummiunneqarluni, kommunilu peqatigalugu ilaqutariit suliap misissorneqarnissaanut akuersissanerlutik aalajangerneqarsinnaalluni. VISO-mi immikkoortortaqarfiup kommuninut kaammattuutigaa inatsisit nutaat eqqumaffigissagaat aammalu meeqqanut inuusuttunullu siunnersortinut tamanna pillugu paasissutissiissagaat.

Suliap VISO-mi immikkoortortaqarfiup suliap misissorneranik suliarineqartussanut ilaasinnaassappat, piumasaqaatit uku naammassineqassapput:

1. Meeraq 18-it inorlugit ukioqarpa aammalu massakkut inissinneqarsimava?
2. Meeraq imaluunniit ilaqutariit sullinniakkanut ilaava
3. Suliamut atatillugu misissuutit aalajangersimasut atorlugit misissuisoqarsimava
4. Angajoqqaatut oqartussaasumit kiisalu inuusummit 15-it sinnerlugit ukiulimmit akuersissummik tunniussisoqarsimava - suliap meeqqamut pitsaanerpaajunissaa pissutigalugu akuersissummik pisariaqartitsinnginneq pineqanngippat (kommunip naliliinera)

Piumasaqaatit tamarmik eqquutsinneqarsimassapput.

Suliat misissorneqartussatut nassiunneqartassappat, misissuutit assersuutigalugu PPR-imi imaluunniit Børnehusimi atorneqarsimasut?
Tamanna suliami pineqartumi naliliinikkut aalajangerneqassaaq VISO-mi immikkoortortaqarfik peqatigalugu oqaloqatigiinnikkut. Ataatsimut isigalugu kommunip suliat, misissuutit atorneqarsimasut isumaginninnermut tunngasumik naliliinermi ilaasut nassiutissavai. Suliat taamaattuni kommunip FKU/tarnip pissusaanut tunngasumik misissuineq, meeqqanut tunngasumik misissuineq, aalajangiineq aammalu pisariaqarpat innersuussut kiisalu meeqqanut inuusuttunullu ataatsimiititaliap aalajangiinera nassiutissavai.

Immikkoortortaqarfiup qanoq nalilertarpaa misissuutip atorneqarsimanera naliliinermut eqqunngitsumik sunniuteqarsimanersoq?
VISO-mi immikkoortortaqarfiup suliami allagaatinut tunngasut misissorlugit misissuutip kommunip aalajangiineranut qanoq sunniuteqartiginera nalilertarpaa. Naliliinermi misissuutip imarisai inerniliussaalu kommunip misissuineranut naliliinerinullu allanut sanilliunneqassapput. Pingaartumik isiginiarneqassaaq suliami kalaallit piorsarsimassusiat oqaatsinillu paasinninneq naammattumik eqqarsaatigineqarsimanersoq.

Misissuutit suut atorneqaqqusaanngillat?
Inatsisit aalajangersarpaat tarnikkut misissuutit aalajangersimasut atorneqaqqusaanngitsut kalaallit oqaasiinut piorsarsimassutsimullu naleqqussarneqarsimanngimmata. Misissuutit atorneqaqqusaanngillat, tassami misissuinermi inernerit paasiniarneqartut eqqortumik tutsuiginartumillu takutitsisinnaanngitsoorsinnaammata. Suliat ilaannik paasissutissanik allanik, immaqa misissuutinut assingusunik atorneqarsimasumik suliarisaqaruit imaluunniit periuseq atorneqarsinnaanersoq nalornissutigigukku, VISO-mi immikkoortortaqarfimmi immikkut ilisimasalimmut saaffiginninnissat innersuussutigaarput.

Tarnikkut misissuut aalajangersimasoq sunaava?
Tarnikkut misissuut aalajangersimasoq tassaavoq misissuinermi periusissaq, atorneqarnermini periuseq aalajangersimasoq malillugu ingerlanneqartoq, inernerilu amerlanertigut kisitsisinngorlugit imaluunniit immikkoortunut agguarlugit saqqummiunneqartartut, nalinginnaasumillu malittarisassamut imaluunniit assersuutinut sanilliunneqarsinnaallutik. Misissuutit taamaattut atorneqarneranni nalilersuinermilu assingusumik ingerlanneqarnissaat anguniarneqartarput, apeqqutaatinnagu meeqqat imaluunniit.

Immikkoortortaqarfik meeqqat inersimasullu sorlernik sullissisarpa?
Pisussaaffik suliani atuuppoq, meeqqap, inuusuttut imaluunniit angajoqqaanngortussap imaluunniit angajoqqaatut oqartussaassuseqartup Kalaallit Nunaanni inunngorsimappat imaluunniit peroriartorsimappat, imaluunniit allatigut kalaallit oqaasiinut, kalaallit piorsarsimassusaannut aammalu kalaallit naleqartitaannut attuumassuteqartutut nalilerneqarpat.

Meeraq imaluunniit inersimasoq Kalaallit Nunaanni inunngorsimanngitsoq imaluunniit peroriartorsimanngitsoq, kisianni kalaallit piorsarsimassusiannut naleqartitaannullu qanimut attuumassuteqartuulluni, kalaallit oqaasiinik piorsarsimassutsimillu immikkut ilisimasalimmik immikkoortortaqarfik peqataatinneqarnissaa kissaatigippagu qanoq iliortoqassava?
VISO-mi immikkoortortaqarfiup kaammattuutigaa meeraq imaluunniit inersimasoq oqaloqatigineqassasoq, taamaalilluni Kalaallit Nunaannut atassuteqarnera peroriartornerani sumik tunngaveqarnersoq paasisaqarfiginerussallugu. Oqaloqatigiinnerup kingorna suli nalornissutigigussiuk piorsarsimassutsikkut oqaatsitigullu attuumassuteqartoqarnersoq, VISO-mi immikkoortortaqarfik saaffiginissaa kaammattuutigaarput. Inatsit naapertorlugu kommunip innuttaasoq Kalaallit Nunaannut attuumassuteqartutut nalilerpagu kommunip immikkoortortaqarfik saaffigissavaa. VISO-mi immikkoortortaqarfik suliami ataasiakkaami aalajangissaaq meeraq imaluunniit inersimasoq inatsisit atuuffiannut ilaanersoq.